Цэргийн төв эмнэлгийн “Эрдмийн чуулган-2024” эрдэм шинжилгээ, онол практикийн хурал 2024 оны 10 дугаар сарын 17-ны өдөр Үндэсний батлан хамгаалахын их сургуулийн “Сүбээдэй” танхимд амжилттай зохион байгуулагдлаа.

Монгол Улсын орчин цагийн эрүүл мэндийн анхдагч 103 жилийн түүхтэй шинжлэх ухааны ууган эмнэлгийн “Эрдмийн чуулган-2024” эрдэм шинжилгээ, онол практикийн энэ удаагийн ээлжит бага хурал нь Монгол Улсын орчин цагийн эрүүл мэндийн салбарт Мэс засал, Дотрын алба үүсэн хөгжсөний түүхт 100 жилийн ойд зориулан зохион байгуулагдснаараа онцлогтой юм.

Тус эрдэм шинжилгээ, онол практикийн хуралд академич, анагаахын шинжлэх ухааны доктор, профессор Н.Баасанжав болон Анагаахын шинжлэх ухааны үндэсний их сургуулийн багш нар, ЦТЭ-ийн эмч, эмнэлгийн мэргэжилтнүүд, судлаач нийт 80 гаруй хүн оролцлоо.

Зочин илтгэгчээр:

1. Интермед эмнэлгийн эмчилгээ эрхэлсэн орлогч захирал, Канадын Dalhousie их сургуулийн дэд профессор Э.Ундрах-Эрдэнэ “Хиймэл оюун ухааныг дүрс оношилгоонд нэвтрүүлсэн нь”,

2. Батлан хамгаалахын эрдэм шинжилгээний хүрээлэнгийн судлаач, ахмад Н.Мөнх-Эрдэнэ “Хиймэл оюун ухааныг цэргийн сургалт бэлтгэлд ашиглах боломж, үр өгөөж” сэдэвт илтгэл танилцуулсан нь анагаах ухаан болон батлан хамгаалах салбарт хиймэл оюун ухааныг ашиглаж буй өнөөгийн байдал, цаашдын чиг хандлагын талаар сонирхол татахуйц сэдэв байлаа.

Эрдмийн чуулганы шүүгчдээр:

АШУҮИС-ийн Анагаах ухааны сургуулийн мэс заслын тэнхимийн ахлах багш, АУ-ны доктор, дэд профессор Д.Зориг;

АШУҮИС-ийн Био-Анагаахын хүрээлэнгийн Иммунобиологийн лабораторийн ЭША, АУ-ы доктор, дэд профессор Л.Энхсайхан;

АШУҮИС-ийн Био-Анагаахын сургуулийн Дархлаа судлалын тэнхимийн багш, АУ-ны доктор Б.Ариунзаяа нар оролцлоо.

ЦТЭ-ийн хамт олон тус хуралд 57 эрдэм шинжилгээ, судалгааны ажил, эмнэлзүйн ховор тохиолдлын судалгааг бэлтгэн хэлэлцүүлснээс:

ТЭРГҮҮН БАЙР-т “Цэргийн төв эмнэлэгт хийгдсэн элэгний тайралт бүхий мэс заслын дараах цус бүлэгнэлтийн алдагдал болон ялтас эсийн тоо цөөрөх байдалд хийгдсэн ретроспектив судалгаа” сэдэвт “Эрчимт эмчилгээ, мэдээгүйжүүлэг, хагалгааны нэгдсэн төв”-ийн их эмч, ахлах дэслэгч Д.Энхмандах нарын;

ДЭД БАЙР-т “Бие махбодын хэмжилтийн зарим үзүүлэлтийг бүлгүүдэд харьцуулан 24 цагийн шээсний креатининтай холбон судалсан дүн” сэдэвт “Бөөр, дотоод шүүрэл судлалын тасаг”-ийн их эмч, ахмад Б.Дэлгэрмаа нарын;

ШИЛДЭГ ЭМНЭЛЗҮЙН ХОВОР ТОХИОЛДОЛ ТЭРГҮҮН БАЙР-т “Варфарин шалтгаант нарийн гэдэсний бөглөрөлт түгжрэл” сэдэвт “Мэс заслын эмнэлзүйн төв”-ийн их эмч Г.Гантогтох нарын эмнэлзүйн ховор тохиолдлын танилцуулга тус тус шалгарлаа.

“ЭРДЭМЛЭГ ХАМТ ОЛОН” шагналаар хамгийн олон эрдэм шинжилгээ, судалгаа, ховор тохиолдлын танилцуулга бүтээл ирүүлсэн “Мэс заслын эмнэлзүйн төв”-ийн хамт олон шалгарлаа.

“Эрдмийн чуулган-2024” эрдэм шинжилгээний хуралд хүрэлцэн ирсэн зочид, багш нар, идэвхтэй оролцсон эмнэлгийн хамт олон, зохион байгуулахад дэмжиж тусласан удирдлага, нийт баг хамт олондоо баярласан талархсанаа илэрхийлье. Цаашдын эрдмийн их ажилд нь өндрөөс өндөр амжилтыг хүсье.